بو طفيل قوش يوز اميديله بودنياده پر آشدى
اورا اوشدى بورا اوشدى او را قاشدى بورا قاشدى
قانادين يولدى جفاپيشه فلك قالدى آراده
بير نفر اولمادى تاكه يته داده
بومصيبتده يازيخ قوش اورهگى قانله دولدى
سارالوب گل كيمى سولدى
* * *
هريانا گتدى مگر دردينه بير چاره تاپا تاپمادى غمدن اوسانيپدى
شيشه صبرى جالانيپدى
غم غم اوسته قالانيپدى
باغ عشقينده اولان ميوهلرى غارت اولوبدى تالانيپدى
* * *
گوزى بير كور قوشا توشدى اونا تومدى
كور گوزوندن ايشيق اومدى
فكر درياسنه جومدى
گوردى بايقوشدى نه شومدى
گوزى پيس ياخشيا يومدى
* * *
اما بيچاره قوشون اوخلارى دگدى داشا قارداش
باور ايتدى او وفاسيز بى ثمر يولداشا قارداش
نجه گور حسرتيدى قارداشا قارداش
غمدى باشدان باشا قارداش
قوى بو غملر داشا قارداش
بلكه باشدان آشا قارداش
* * *
توش گلوب يولدا حرامىلره قلبى اوزولوبدى
گوردى اطرافده قرقى چالاغانلار دوزولوبدى
نجه اوشسون هارا قاشسين
اوستونه مين باز شكارى يوزولوبدى
قورخودان گوز سوزولوبدى
دريسى يا بوزولوبدى
* * *
بوطفيل قوش هارا گيتسين
اشقراغين كيمه سالسين
بو بياباندا قرانلوخ گجهنى تك نجه قالسين
يرى وار نالهسى تا عرش و سماواته اوجالسين
اله دسمالينى آلسين
فلكين قوردى قوجالسين
* * *
آرزولر كه واريدى اورهگينده هدر اولدى
گونى گوندن بتر اولدى
يازيق خون جگر اولدى
نلر اولدى نلر اولدى
بهار 1372 قم