یا معزّا لمن تشا لبّیك
اى ویرن عالمه صفا لبّیك
حمد و نعمت سنوندى ملك سنون
امر امروندى ربّنا لبّیك
یوخ شریكون سنه تعلّقى وار
جبروتیله كبریا لبّیك
گورنجه عشقون ایلیوب طوفان
گورنه غوغا اولوب بهپا لبّیك
عشقون عاشقلرى بلایه سالوب
آچیلوب سفره ولا لبّیك
بیر اولوب عشق و عاشق و معشوق
یغیشوب پرده خفا لبّیك
موج دور سایه دور بو عالملر
هرنه وار سنسن اى خدا لبّیك
سنى هركس ایتورسه نمنه تاپوب
نه غمى گر سنى تاپا لبّیك
بخت بیداریم ایلیوب غوغا
گتوروب گور منى هارا لبّیك
تاپموشام محضرونده فیض حضور
اولموشام حقّه آشنا لبّیك
غم هجراندا چوخ سزیلدامیشام
حاجتیم تا اولوب روا لبّیك
یتشوب باشه روزگار فراق
دردیمه تاپموشام دوا لبّیك
لیك قورخوم بودور جوابیمده
دیه پروردگار لا لبّیك
اى خدا خیل عاشقانوندن
منى سن ایلمه جدا لبّیك
بندبند وجودیمى یاراسان
گوره سن ایلور التجا لبّیك
گورسنور مكه مژده ویر حاجى
ساكت اول سویلمه داها لبّیك
باخ بیر اطرافه گورنه عالمدى
شورمحشر اولوب به پا لبّیك
چكلوب بنده لشكر شیطان
اهل ایمان اولوب رها لبّیك
گوشهوشیله یاخشى بیرقولاغ آس
دولدوروب عالمى صدا لبّیك
فلك و عرش و فرش و كرسیدن
قوزانوب گورنجه ندا لبّیك
قاتیشوب سس سسه بو وادیده
عطر آگین اولوب فضا لبّیك
همصدا دور تمام عالملر
سس چكور ارضلن سما لبّیك
مستجار و حطیم و حلّ و حرم
زمزم و مروه و صفا لبّیك
بوقبیسون تمام صخره لرى
جبل النوریله حرا لبّیك
مسجد خیف و مشعر و عرفات
جبل الرحمه و منا لبّیك
هامى ذرّات عالم خاكى
یكصدا سسلنور خدا لبّیك
معنویت ایاق دوتوپ یرییور
دولدوروب هر یرى صفا لبّیك
بیرده یاران به روز عاشورا
سسلدى شاه كربلا لبّیك
دیدى یا رب طریق وصلونده
هرنه وار ایلدیم فدا لبّیك
گلستانیمده هرنه گل واریدى
اولدولار پرپر جفا لبّیك
اصغر و اكبر و ابوالفضلیم
حق یولوندا اولوب فنا لبّیك
بوفنادن منه بقا اولاجاق
یار ب اى دائم البقا لبّیك
سنون عشقونده هر بلا یتشه
ایتمرم ذرّه اعتنا لبّیك
كائناته مقام قربونده
ویرمرم ارزش و بها لبّیك
باخمارام بو یارالى سینمده
یارالار گلمورى سانا لبّیك
باخمارام خیمهگاهیده زینب
قالدى زلفین یولا یولا لبّیك
افتخاریمدى راه عشقونده
كفنیم اولسا بوریا لبّیك
پیكرمده سنون باشیمدا سنون
راضیم هرنه دور قضا لبّیك
عهدیوه سنده ایت وفا كه حسین
ایتدى اوز عهدینه وفا لبّیك
آخرین لحظه حیاتیمدور
شیعهنى ایلورم دعا لبّیك
ناامید ایتمه جعفرینى خدا
قاپوموزدا اودور گدا لبّیك